Bauk mitt og basl

Bloggfærsla dagsins: Pétur vs. Atli -- eða Jóhannes??

Frétt dagsins: Børsen: Steingrímur iðrast einskis

Bloggfærsla gærdagsins: Ragna þrjótur.....

Bloggfærsla dagsins er um Sverri Jakobsson og Alþjóðagjaldeyrissjóðurinn.

Sjá: Öfugsnúin umræða

Helgina 10.-11. október heldur Rauður vettvangur ráðstefnuna "Baráttudaga í október - ár frá hruni". Á henni verður farið yfir stöðuna í þjóðfélaginu í fjórum málstofum. "Bankahrunið og reynslan af fyrsta ári kreppunnar", "Hver fer með völdin á Íslandi?" og "Átök og verkefni framundan" verða á laugardeginum og sameiginlegur kvöldverður um kvöldið. Á sunnudeginum verður fjórða málstofan, "Ný stefna fyrir Ísland", og eftir hana opinn umræðufundur um skipulag nýrrar byltingarhreyfingar. Frummælendur eru Andrea Ólafsdóttir, Gunnar Skúli Ármannsson, Helga Þórðardóttir, Herbert Sveinbjörnsson, Héðinn Björnsson, Jakobína Ólafsdóttir, Kolbeinn Stefánsson, Lilja Mósesdóttir, Vésteinn Valgarðsson, Þorleifur Gunnlaugsson, Þorvaldur Þorvaldsson, Þórarinn Hjartarson og Þórður Björn Sigurðsson.

Rauður vettvangur er félag sósíalista. Það var stofnað árið 2008 og hefur haldið reglulega og óreglulega fundi, Rauðan fyrsta maí og Rauða daga í Reykjavík í júlí sl. Tilgangur félagsins er að leggja sitt af mörkum í endurskipulagningu íslensks þjóðfélags út úr og upp úr kreppu.

Nánari upplýsingar:
www.raudurvettvangur.blog.is
Vésteinn Valgarðsson - 8629067 - vangaveltur@yahoo.com
Þorvaldur Þorvaldsson - 8959564 - vivaldi@simnet.is

...á þessu bloggi.
Hér með kunngjörist að þessu bloggi, Hversdagsamstri Vésteins, er lokið fyrir fullt og allt. Ég hef flutt mig um set, þó ekki langt. Nýja bloggið er þetta: http://www.vest-1.blogspot.com/ og ég hvet fólk sem er með tengil á mig til þess að breyta honum í samræmi við það.

Ég hef hvorki í hyggju að blogga aftur hér né á Vangaveltu-blogginu. Um Moggabloggið hef ég ekkert ákveðið, en það er á ís í bili.
~~~ ~~~ ~~~ ~~~
Skoðið annars blogg Rauðs vettvangs og dagskrá ráðstefnunnar Baráttudaga 10.-11. október. Glæsileg dagskrá sem enginn alvöru vinstrimaður vill missa af.

Vinstra stígvélið mitt er drasl, það er með einhverjum flipa sem losnaði í þriðja eða fjórða skiptið sem ég fór í það og skósmiðurinn er búinn að festa hann og hann rifnaði aftur. Svo setti skósmiðurinn annan flipa yfir, sá rifnaði líka og hann límdi hann og hann rifnaði aftur. Svo setti hann annan flipa yfir þann. Það var verulega erfitt að komast í stígvélið þá, enda ekki mjög vítt til að byrja með, og auk þess ... rifnaði nýi flipinn frá. Límdur, rifnaði aftur. Ég gafst þá upp og þarf nú að nota skóhorn í yfirstærð til þess að komast auðveldlega í stígvélið.
~~~ ~~~ ~~~ ~~~
Talandi um að gefast upp, þá hef ég notað sömu leðurgrifflurnar daglega í mörg ár. Eftir því sem þær hafa slitnað hefur skóarinn bætt þær, aftur og aftur. Nú er svo komið að elstu bæturnar eru orðanar svo slitnar að það þyrfti að bæta þær. Upprunalega leðrið er orðið svo morkið að það heldur ekki tvinna svo vel sé og starfsheiður skósmiðsins, sem iðnmeistara, forbýður honum að koma nálægt þeim aftur, svipað og hárskerameistari sem vinnur ekki með skítugt hár eða skraddari sem gerir ekki við skítug för. Ég meina, menn hafa nú standard. Þá spyr ég, þekkir einhver skósmið, leðursmið, söðlasmið eða einhvern sem getur lappað upp á skyrmorknar leðurgrifflur með svörtum leðurbótum?

Á jafndægri á hausti skín sólin nákvæmlega 12 klukkutíma alls staðar á jörðinni.

Til hamingju með daginn!

Eldey er alveg við það að byrja að skríða. Það er eiginlega skilgreiningaratriði hvort hún byrjaði á því í gær eða hvort það verður á morgun. Hún er nýbyrjuð í ungbarnasundi fyrir lengra komna.
~~~ ~~~ ~~~ ~~~
Var að senda þetta til Tryggingamiðlunar Íslands:

Góða kvöldið.
Áðan var hringt í mig og mér boðin "tryggingamiðlun". Fyrir utan það að ég er fullfær um það sjálfur að afla mér upplýsinga og setja mig í samband við fyrirtæki ef ég kæri mig um tryggingar, þá var hringt klukkan 19:08. Á þeim tíma er flest heiðarlegt fólk að borða kvöldmat. Rímar þetta við það sem þið segið á forsíðunni, um "góða þjónustu"? Þið megið bóka það að ef ég kæri mig einhvern tímann um ráðleggingar í tryggingamálum, þá mun ég snúa mér til keppinautarins.
Kveðja, Vésteinn Valgarðsson

~~~ ~~~ ~~~ ~~~
Í dag og í gær fór Vantrú í Háskóla Íslands og skráði 35 manns úr ríkiskirkjunni. Við verðum aftur á morgun og hinn!

Bloggið hefur ekki verið efst á forgangslistanum undanfarið hjá mér. Ekki veit ég hvenær ég tek aftur til óspilltra málanna að deila hugsunum mínum með internetinu, á þessari síðu og öðrum. Þið haldið bara niðri í ykkur andanum á meðan.
~~~ ~~~ ~~~
Í stuttu máli sagt:
* Eldey dafnar ennþá vel og er á allan hátt eins og ég helst gæti óskað mér. Við erum öfundsverðir foreldrar, þótt ég segi sjálfur frá.
* Garðurinn er á góðri leið með að breytast í frumskóg. Matjurtirnar hafa það samt sæmilegt, við erum að éta aðra uppskeru af radísum og gulrætur og rófur eru einnig komnar á matseðilinn.
* Ég skrapp á Wacken Open Air um daginn, í tíunda skiptið í röð. Það var nú gaman, þótt ég hafi aldrei áður verið jafn lengi í burtu frá Eldeyju.
* Rauðir dagar, sem Rauður vettvangur hélt um daginn, tókust býsna vel. Þeir verða endurteknir áður en langt um líður. M.a. stefnum við á að halda ráðstefnu í októberbyrjun.

Fyrsta tönnin kom í ljós í Eldeyju í gær.
~~~ ~~~ ~~~ ~~~
Úff -- það hrannast upp verkefnin þegar maður bregður sér af bæ. Það er ekki lítið illgresi í garðinum hjá mér í augnablikinu...

Eldey dafnar hratt, stækkar og stækkar og fylgist vel með umhverfi sínu. Hún hefur m.a. gaman af að fara í krumlu við tærnar á sér.
~~~ ~~~ ~~~
Í fyrradag tók ég upp síðustu radísurnar og í gær sáði ég aftur í beðið.
Í vor leist mér ekki á blikuna, matjurtalega séð. Hinn hefðbundni matjurtagarður er nefnilega í hers höndum. Það hefur þó aðeins ræst úr matjurtaræktinni. Ég endaði með að sá ekki bara radísum, heldur rófum, hvítkáli, rauðkáli, hnúðkáli, rósakáli, brokkolíi, blómkáli, spínati, lauk, hvítlauk, gulrótum -- já, og svo setti ég niður kartöflur. Undir þetta allt saman smíðaði ég fimm stóreflis matjurtabeð og þrjú smærri líka, og kom fyrir framanvið húsið, á blettinum og fyrir aftan hús. Mjög myndarlegt, þótt ég segi sjálfur frá.
~~~ ~~~ ~~~
Hana, þetta held ég sé aðeins snyrtilegra.

Í gærkvöldi tók ég upp fyrstu radísurnar úr garðinum, þær voru ljúffengar!
~~~ ~~~ ~~~ ~~~
Motörhead, In Extremo, Saxon ogTom Angelripper verður á Wacken. Ég er að drepast úr tilhlökkun.

Árni Stefán Jónsson, formaður SFR og sitjandi formaður BSRB, sat fund með Steingrími J. Sigfússyni og Jóhönnu Sigurðardóttir, þar sem staðan í kjarasamningum hefur væntanlega verið aðalmál á dagskrá.

Fyrir lífi ríkið rær,
rekkum mjög til ama.
Árni Stefán áheyrn fær
en ekki Dalai Lama.

Eldey Gígja dafnar vel, verður mannalegri og mannalegri með hverjum deginum. Hún er nú rétt orðin fjögurra mánaða og er mjög efnileg. Ég er kannski svolítið hlutdrægur. Æi, ætli manni fyrirgefist það ekki.
~~~ ~~~ ~~~
Ég hef ekki farið mikinn á netinu undanfarið, hvorki á bloggi né annars staðar. Barnastúss tekur náttúrlega tíma, en frítími hefur aðallega farið í garðvinnu. Ég er búinn að sá og planta mjög miklu af matjurtum, búa til matjurtagarða þar sem áður voru grasblettir í garðinum, og næst á dagskrá er að hlaða grjóti. Hef gripið stein og stein á ferðum mínum um bæinn, en fór áðan við þriðja mann og við sóttum á að giska eitt og hálft tonn af grjóti kerru. Það er samt bara brot af því sem þarf áður en yfir lýkur. Ég hlakka vægast sagt mikið til að fara að hlaða af alvöru.
~~~ ~~~ ~~~
Eftir púl í garðinum er fátt betra en að fá sér einn ískaldan. Ég hef undanfarið lagt mig eftir því að smakka nýjar og nýlegar íslenskar bjórtegundir. Brugghúsið í Ölvisholti kemur sterkt inn; Mungát er hreint sælgæti, Móri hinn ljúffengasti líka og Skjálfti sömuleiðis. Lava er ekki eins fyrir minn smekk; imperial stout höfðar ekki svo til mín. Meðal annarra sem verðskulda meðmæli eru Jökull og Skriðjökull frá Stykkishólmi, og svo sá sem trónir á toppi íslenskra lagera: El Grillo. Öll þessi nýju brugghús eru þörf og tímabær viðbót við ölmenningu Íslands.

Eldey varð þriggja mánaða á föstudaginn var. Buðum nánustu ættingjum í heimsókn. Grilluðum í holu úti í garði. Þessir þrír mánuðir hafa liðið hratt.
Eldey dafnar vel. Þegar hún fór í þriggja mánaða skoðun sýndi mæling að frá níu vikna skoðun hafði hún þyngst um 600 grömm og lengst um 3 sentimetra. Með sama áframhaldi verður hún, þegar hún kemst á minn aldur, um 280 kíló að þyngd og um 14 metrar á hæð.
~~~ ~~~ ~~~ ~~~
Ég hef ekki mikið getað unnið í garðinum undanfarið, en það kemur að því að ég geti farið að gera það. Ég er meðal annars ekki viss um að matjurtagarðurinn verði neitt sérstaklega merkilegur í ár. Eða réttara sagt, þá verður hann það varla úr þessu.

Eldey vaknaði um hálfsjö-leytið í morgun. Öllum að óvörum rak hún upp skellihlátur.
Það er allavega greinilegt að hún hefur ekki morgungeðvonskuna úr föðurættinni.

~~~ ~~~ ~~~ ~~~

Afhendingar tvær:

Litlu vil ég lofa um hvað leysa kratar,
formenn þeirra og flokkasnatar.

En bráðum kemur byltingin með blóm í haga,
og sósíalíska sumardaga.

Ég sá í veðurfréttum að spáð væri "hægri norðangolu".

Loks er vorið virtumst sjá
vonin gjörist lægri:
Norðangolu nú þeir spá
napurri og hægri.

Eldey Gígja dafnar vel. Hún sást fyrst brosa í mánaðarafmælinu sínu, og í fyrradag átti hún tveggja mánaða afmæli og sást þá brosa út í annað, í fyrsta sinn svo ég viti. Eftir nokkuð vesen með viðgerðir er barnavagninn kominn í nothæft ástand og hagt að fara út að ganga með hana í honum. Þetta er stórskemmtilegt, verð ég nú bara að segja.

Verður þess minnst, er hægri her
hrundi, með kynstrum sleginn.
Gæfan finnst þó: Grasið er
grænna vinstra megin.

Hvernig getur ein vatnsdeigsbolla kostað 300 krónur? Getur einhver frætt mig um það?

Eldey Gígja varð fjögurra vikna í dag og dafnar vel. Þessar fjórar vikur hafa verið fljótar að líða. Ég hef lært það, meðal annars, að fæðingarorlof er ekki eins og frí. Það er margt sem ég sinni ekki eins og ég gerði fyrir nokkrum vikum síðan. En ég býst við að ég megi kallast forfallaður af gildum ástæðum.

~~~ ~~~ ~~~ ~~~

Um daginn þurfti ég að fletta nokkrum símanúmerum upp í símaskránni, og opnaði hana á réttri blaðsíðu -- tvisvar sinnum. Mér leið eins og ég hefði farið holu í höggi tvisvar sama daginn.

Talandi um símaskrána, þá las ég hana loksins um daginn, þ.e.a.s. myndasöguna. Hún var ágæt.